កំពង់ចាម៖នៅព្រឹកថ្ងៃទី១២ខែកក្កដាឆ្នាំ២០១៦នៅទីអារាមវត្តវិបស្សនារាមហៅព្រែកចង្ក្រាន ឃុំល្វេស្រុកកោះសូទិនមានការរៀបចំការបោះឆ្នោតជ្រើសរើសគណៈកម្មការអាចារ្យវត្ត ក្រោមអធិបតីភាពលោកផេន សុផល អភិបាលនៃគណៈអភិបាលស្រុកកោះសូទិន។
ពិធីបោះឆ្នោតជ្រើសរើសគណៈកម្មការអាចារ្យវត្តក៏មានការនិមន្តចូលរួមពីព្រះសង្ឃ ពុទ្ធបរិស័ទ ចំណុះជើងវត្ត លោកលោកស្រីជាសមាជិក ក្រុមប្រឹក្សាឃុំ មេឃុំ ប្រធានការិយាល័យ ធម្មការសាសនាស្រុក លោកលោកស្រី អភិបាលរងស្រុកកងកម្លាំងទាង៣ ព្រមទាំងមេភូមិនិងប្រជាពលរដ្ឋជាច្រើននាក់ផងដែរ។
ក្រោយពីស្ដាប់របាយការណ៍របស់លោក គណៈកម្មការវត្តចាស់បានអានជូននូវសមិទ្ធផលដែលសម្រេចបានក្នុងវត្តនៅក្នុងការដឹកនាំអណត្តិរបស់ខ្លួន គោរពជូនគណៈអធិបតីរួចមក នាឱកាសនោះ លោកសាយ ស្រ៊ាងមេឃុំល្វេ និងលោកហោអូនប្រធានការិយាល័យកិច្ចការធម្មការសាសនាស្រុកបានលើកឡើងនិងបានអាននូវខ្លឹមសារ ណែនាំក៏ដូចជានិតិវិធី នៃការបោះឆ្នោត ជ្រើសរើសគណៈកម្មការអាចារ្យវត្ត ដែលប្រព្រឹត្តិរៀបចំឡើង៣ឆ្នាំម្ដង ហើយលោកប្រធានការិយាល័យធម្មការសាសនាស្រុក បានរៀបចំបង្កើតគណៈកម្មការនិងសន្លឹកឆ្នោត ដើម្បីឲ្យដំណើរការនេះប្រព្រឹត្តដោយរលូននិងទទួលយកបាននូវលទ្ធផល ជាវិជ្ជមាន។
ដំណើរការបោះឆ្នោតបានចាប់ផ្ដើម ប្រកបដោយរីករាយ ហើយគណៈកម្មការបានធ្វើការបូកសរុបនូវសម្លេង លទ្ធផលនៃការបោះឆ្នោត និងទទួលយកពុំមានការប្រកែកអ្វីឡើយ ។
ថ្លែងទៅកាន់អង្គប្រជុំនាឱកាសនោះលោក ផេនសុផល អភិបាលនៃគណៈអភិបាលស្រុកកោះសូទិនបានលើកឡើងដែរថា៖លោកសូមកោតសរសើរចំពោះកិច្ចខិតខំប្រឹងប្រែងរបស់គណៈកម្មការអាចារ្យ បានសហការនិងព្រះគ្រូចៅអធិការ វត្តរួមនឹង ពុទ្ធបរិស័ទ ចំណុះជើងវត្តដែលបានចូលរួមសកម្មភាពការអភិវឌ្ឍ លើវិស័យពុទ្ធសាសនាបានល្អប្រសើរ ដែលជាសាសនារបស់រដ្ឋ លោកអផិបាលក៏ស្នើដល់គណៈកម្មការដែលជាប់ឆ្នោតថ្មី ត្រូវខិតខំ សកម្មភាព ដឹកនាំវត្ត ឲ្យបានល្អ សហការនិងអាជ្ញាធរ សមត្ថកិច្ច ពេលមានសកម្មភាពអសន្តិសុខដែលកើតមានឡើងជាយថាហេតុ ត្រូវចេះរួបរួមសាមគ្គីផ្ទៃក្នុង ប្រកបដោយប្រសិទ្ធភាព តាមផែនការនែនាំរបស់ក្រសួងធម្មការនិងរាជរដ្ឋាភិបាល ។
បន្ទាប់មក លោកអភិបាល ក៏បាននាំយកទៀនព្រះវស្សា ព្រមទាំងទេយ្យទាន និងថវិកា មួយចំនួនដែលជាការឧបត្ថម្ភរបស់ឯកឧត្តមខៀវកាញារីទ្ធរដ្ឋមន្ត្រីក្រសួងព័ត៌មាននិង ជាប្រធានក្រុមការងារចុះជួយស្រុកកោះសូទិនប្រគេនជូនព្រះតេជគុណដែលគង់នៅចាំព្រះវស្សានាឱកាសនោះផងដែរ៕អត្ថបទ៖សីហា